موضوعك مره حلو ومن جد ايام الدراسه حتى لو كانت متعبه بس فيها زكريات مره حلوه
انا سارلي سنتين متخرجه افتكر اخر يوم كانو البنات يبكو ويحضنو بعض طبعا انا مو من النوع الي ابكي من شي زي كدا بس كنت حزينه لاني بفارق صحباتي وسلمت عليهم وعلى بنات فصلي كلهم
بس والله اني اشتقت للمدرسه من جد اشتقت للابلات ولصحباتي وللمواد مع اني كنت اقول وقتها متى افتك من المدرسه
اخر سنه مرت عليا تالته علمي كان مره فيها ضغط عليا لانو كانت عندي مشاكل عائليه اتوقعت اني ارسب بس الحمد لله كانت نسبتي فوق ال90 %
اما مديرة مدرستنا شي تاني كانت انسانه تخوف الي مايخاف لما تعدي من جنبنا نررجف كاننا فيران والله الين دحين احلم فيها كنا نقول شكلها تضرب زوجها في البيت
كانت انسانه جدا قويه محد يقدر عليها ومهما كانو البنات مشاغبات حيتربو على يدها
بس كانت تحبني لاني من بنات العلمي
اشتقت لابله سمر ابلة الرياضيات الله يذكرها بالخير كان شرحها مره حلو ودايما تشجعني وماتحبطني وابله ناديه ابلة الاحياء شرحها كان يجنن وكنت احبها بس مره كنت في حصتها جايه من برا دخلت الفصل وصفقت الباب بقوه وهيا موجوده >> كل ماافتكر اني سويت كدا عشاني كنت زعلانه من درجتي في الرياضيات استحي لاني كنت دايما هاديه اتمنى انها تسامحني على دي الحركه االبايخه الي سويتها
من بعد داك اليوم بنات الفصل سارو يخافو مني ومن عصبيتي
وابله رقيه ابلة الانجليزي كان طيبه وشرحها حلو بس تعاملنا على اننا جامعيات في الاختبار النهائي جابتلنا محادثه فزيعه تبغانا نحول اليورو للريال مدري العكس وهدا الشي مهو موجود عندنا الله يسامحها
ابله عايشه ابلة الكيميا تشرح وشويا وتنام بس الحمد لله كنت افهم شرحها كانت طيبه وكوميديه
ابله عزيزه ابلة الفيزياء ياناسو عليها مره كانت طيبه بس خطها سريع وشخاميط بس اسئلتها مره سهله وماكانت تقسى علينا ربي يسعدها
ابلة الدين ابله عايشه شرحها كان خطير بس كان يقهرني فيها انها ماتقوم البنت الي تشارك تقوم البنت المتنحه او الي ماتعرف الاجابه
والاخص من كدا في حصة القرأن لما نسمع بالغيب تخلينا نسمع واحنا واقفين فنص البنات كانو يخربطو من الربكه الله يسامحها
ابلة العربي نسيت مين هيا عتقد انها ابله حسنا كانت طيبه
وابله ابتسام ابلة الفقه نسميها اختصارات فضيعه تلخص الدرس كلو في سطرين ع السبوره ربي يسعدها
بس فيه ابله كنت اكرهها الي هيا المساعده ولاخر يوم من حياتي حكرهها واقولها الله لايوفقك ولا يساعدك ولا يسعدك لادنيا ولا اخره كانت تكرهني بدون سبب وماتدرسني اصلا
اما الفسحه حقتنا كانت شي يدوب تلحقي تشتري فطورك الا وتسمعي الجرس
طبعا في الفسحه لازم كل يوم يمر فار او حمام يسلم عليكي كانت مدرسه توووحفه
وبنات شلة زوم 6 ماانساهم حشينا فيهم الين ماقلنا بس الله يهدينا
ونسيت لولو العسوله كانت بنت من سنه اولى تعجبني ونفسي اسير صحبتها بس ماكانت عندي جراه حتى مااعرف اسمها بس اسميها لولو لانها تشبه شخص اعرفو
واحلى شي لما كنا نروح نطقطق على بنات الادبي لاننا علمي واشطر منهم خخخخ
بس فعلا اكتر شي اشتقت لصحباتي وفصلي خصوصا صحبتي دندونه توأم روحي اخر يوم اشترينا كاديه بالفراوله والغطا حق العصير اخدناه معانا الين دحين معايا زكرى