نحن والدراما الاسيويه ما ذا عن : الكوريين والدراما العربيه؟؟؟

[dala3]

السلام عليكم

بما اننا محبي الدراما الاسيويه مجتمعين في هالمنتدى الرائع

((وبما انى اول مره اكتب موضوع هنا صصصص لااحد يسمعنى ))

كنت قاعده افكر في فكره اشغلت تفكيري وما قدرت امنع نفسي عن عدم كتابتها ومناقشة ارائكم فيها

بسبب متابعة الدراما الاسيويه و عشقنا لها صار عندنا ثقافه يابانيه وكوريه

صرنا نعرف عاداتهم, طريقة اكلهم , ايش الاشياء اللي يحبونها
اغلب الكلمات المهمه في لغاتهم نحفظها ونرددها
صرتي اذا شفتي صديقتك بالجامعه قلتي لها اوهايوا وتودعينها بسيونارا
بعد ما كانت هاي وباي اللي ودعناها
واذا صقع كتفك بوحده بالغلط صرنا نقول ميانيه

واذا بتشكرينها قلتي لها كومساميدا او اريجاتوا كوزايماس

صرنا حركات وكشخه واهم شي اذا شفنا عيون ممططه يحكي نقدر نعرف هل هو كورى والا ياباني والا صيني والا تايوانى بعد ما كان كل اللي عيونهم ممططه اسمهم صيني (( سوري عالعيون الممططه بس ما ادري كيف اعبر ))

بعد المقدمه الطويله العريضه هذي ((اللي ادري انها مااااصله ومالها داعي ))

باقولكم قصه صارت معي
الصيف الماضي رحت ادرس اللغه في معهد في بريطانيا , بعد ما دخلت الصف
كان معي بالقروب 3 كوريات واثنين كوريين ومن اليابان بنت ورجال (( واااااااااي تشققت من الوناسه
ما اقدر اتحمل شي اكثر من طاقتي ))
<<< طبعا الاخت ما صدقت الكلاس يخلص عشان تنخلهم وتسولف معهم طبعا عطونى الوسام الذهبي في الدراما وخاصه الكوريين

و اكتشفت اني تابعت دراما وافلام هم ماقد شافوها , قلت لهم اسماء ممثلين هم ما يعرفونهم اصلا

في وحده من الكوريات ما كانت تتكلم معي بحريه اول الوقت وما كنت اعرف ليش

لكن الصدمه انى بعد ما رجعت البلد لقيتها مرسله لي ايميل تقول انا كنت مرره مفتشله منك لانك تعرفين عنى بلادي اشياء وانا ما اعرف ولا شي عن بلدك

ووحده ثانيه ارسلت تسالنى من وين اقدر الاقي دراما سعوديه او عربيه عشان نفسي اتعرف على ثقافتكم (( ذي بصراحه ورطتني))

ومن وقتها وانا افكر بالموضوع

الدراما اليابانيه والكوريه ما كنا بنفكر نشوفها او نتابعها لو ما كانوا هم انفسهم ترجموها للانجليزيه
وبما انها مترجمه عالاقل واحد حاول يحملها ويجرب يشوفها
اتحدى واحد تابع هالمسلسلات وما يعرف يقول لي شي عن عاداتهم
مثل ايش هي وجبتهم الرئيسيه ايش هو فطورهم
التقاليد والاعراف الدينيه حقتهم
الاشياء اللي يسوونها وقت ما يموت لهم ميت
واشياء ثانيه مثل طبيعة مجتمعهم و طريقة معيشتهم ......الخ
(( الشي اللي تفاجات منه انه حتى هم عندهم الشباب اللي يلعبون عالبنات الى ان تحمل ويتركها وكيف انه هالشي غير مقبول عندهم ))

ولو فكرتو فيها من جهتهم شوي باسالكم ؟؟

كم كوري او ياباني يعرف ان الوجبه الرئيسيه عن الخليج هي الكبسه ؟؟؟
كم واحد يعرف عاداتنا في التبني ؟؟
او في الزواج ؟؟ او عند الوفاة ؟؟
كم واحد يعرف كيف نصلي ؟؟ واننا ما ننحنى ونسجد لغير الله ؟؟

اعتقد ان هالشي مو بس من ناحيه ثقافيه فقط الفائده بتكون كبيره من كل النواحي
يكفي ان الاعلام يشوه سمعه العرب والمسلمين

تخيلوا الشي الوحيد اللي كانو يعرفونه قالولي انتم في بلدكم تلبسون الشادو (( اللي هو الحجاب حق افغانستان )) ؟؟؟

لذلك يا حبايبي لازم احنا نتلحلح شوي ونترجم المسلسلات العربيه للانجليزيه حتى لو كانت مجرد ملفات ترجمه بدون لصق
لازم نحاول ننشر ثقافتنا زي ما هم قاعدين ينشرونها لنا
قلت مارح اظلم العرب قبل ما اكتب هالموضوع فبحثت و حاولت ادور مسلسلات عربيه مترجمه للانجليزيه لكنى للاسف مالقيت شيء للتحميل


بصراحه افكر بعمل مدونه باللغه الانجليزيه للتعريف بالمسلسلات العربيه حتى لوكانت على شكل تقرير مبدايا لتحديد المسلسلات المناسبه للترجمه
ااااااااااااسفه جدا عالاطاله (( ماتحسين انك طولتيها وهي قصيره ))

اتمنى اسمع ارائكم بهالخصوص لان فعلا الفكره داخله بمزاجي بقوه
لاني احس احنا العرب قاعدين نتعلم اي ثقافه تجينا ونندمج معها بداية من الامريكي للهندي والمكسيكي والكوري واليابانى والتايوانى والصيني والتركي ما ادري وش بيجينا عقب ذا كله

لكن ما اتوقع ولا واحد منهم تاثر بالثقافه العربيه ايا كانت خليجيه او مصريه او سوريه ... الخ

بالتاكيد استقبل الانتقادات بصدر رحب (( اول نقد بيكون تكفين من زين مسلسلاتنا اللي بتعجب الكوريين صح لكن لو دورنا شوي بنلاقي اشياء حلوه خصوصا من المسلسلات القديمه شوي لا ن الجديده اغلبها ضرب وهواش ))

اسفه عالاطالة .. وشكرا

salaaaaaaaaaaaaaaaaaaaaaaaaaam

الموضوع الأصلي : نحن والدراما الاسيويه ما ذا عن : الكوريين والدراما العربيه؟؟؟ || الكاتب : dala3 || المصدر : منتديات أنيدرا