السلام عليكم ورحمة الله وبركاته..
ما اعرف هل هي فكرة مجنونة.. ولا كم المشاعر اللي داخلي..
ولا هو الوقت لانه فناتقي ما تطلع الا آخر الليل..
لكني قررت افتح مدونتي الخاصة ديان النيوزية التربل اسيه والسوانيه المعتقة
..
دايم اجي متأخرة في هذه الاشياء لكن أن تأتي متأخراً خير من الا تأتي ابداً..
ما راح انمق الكلام ولا اتكلف فيه لانه هذه عادتي من عرفتوني اذا كنتوا تعرفوني
..
فايتنغ يا انا!
امممم بصراحة ماعرف كيف ابدأ لكني دايم في كل مدونة افتحها احب اعرف بنفسي..
عشان انتم اعزائي القراء اللي راح يتحملون فضفضتي تعرفوني كويس!
اسمي ديان .. أميرة نيوز دائماً وابداً والى اللانهائية وما بعدها
وعجزت القى سوان انثى اقدم مني (سوان من خمس سنين تقريباً!)..
عمري 26 سنة وحالياً امتلك مشروعي الخاص (ادعوا لي انه الله يوفقني فيه)..
مع اني عرفت بانيدرا في بداياتي باسلوبي القوي والهجومي وعلى قولتهم انسانه مهوية
الا اني في الحقيقة اختلف تماماً فأنا انسانه هاديه تماماً (صدق او لا تصدق
) ما احب الازعاج ولا كثرة الكلام وستريت.
عندي مباديء لا ولن احيد عنها ان شاء الله..
حلمي اني انحف ويكون عندي اربع او خمس عيال في المستقبل ان شاء الله :
اتمنى بنت بعدين بنت بعدين توأم ولدين (اذا كانوا خمسة اتمنى يكون بنت بعدين بنت بعدين توأم ولدين بعدين بنت)..
كثير كانوا يسألوني ليش ما اغير لون خطي الاحمر لانه يعمي
بس الحقيقة اختياري لهاللون لحبي الشديد له..
بسبب حبي لهاللون ابتكرت هذه الايقونة
< احس انها اكثر وحده تعبر عني كونها الايقونة الوحيدة اللي سويتها في حياتي..
تعالوا احكي لكم عن تاريخي الكي بوبي والجاي بوبي..
والله ودي اخليكم تحكون بس هذه مدونتي ما يصير احد يحكي فيها غيري مو؟!
بدأت حكايتي اصلاً مع الكي دراما مع دراما ماي قيرل في عام 2005..
بعدها طحت في اليابانين وكنت اتابع اكثر شيء دراما بي
في عام 2008 صرت نيوزية وحبيت رجلي وابو العيلان تاكهيسا ماسودا من نيوز..
قمت بتأليف قصص تالي الليل مع صاحبتي سوسو الله يذكرها بالخير..
وفي هذه القصص ولدا رأفت الهجان ماسودا وتاكهيسا ماسودا الصغير..
وصار عندي ليديا من قصة سحورة بنتي..
قعدت مع اليابانين لحالهم الى عام 2009 لما حبيت يوري من بناتي
..
بعدها بفترة صرت احبهم هم
وفي 2009 بعد حبيت جوني (كيم هيونغ جون) الماكني في الدبل اس وهو المفضل عندي في آسيا كلها..
بس كنت احب فرق محدوده مررره من الكي بوب حتى العام الماضي شفت برنامج لاكسو
وبدأت انفتح على العديد من الفرق..
خواتي يقولون عني امشي واخق بس ما احس انه هالشيء صحيح
لاني اعرف المفضلين عندي في كل فرقة يمكن اخق على الاعضاء الثانيين بس
المفضلين عندي ثابتين ما اغيرهم مو هذا المهم ولا ايش!
احب انيدرا
وهو ما زال المنتدى المفضل عندي والوحيد اللي قدرت اكمل فيه..
انساحبي المفاجئ, ابتعادي وتقصيري كان بسبب انني افتقد الاجواء القديمة للمنتدى
وتعبت نفسياً من الركود اللي يعيشه! لكني ما زلت احبه وهذا هو سبب عودتي الدائمة! شيء خارج هالعالم!
احب اقرأ ومن صغرتي قارئة نهمة.. افضل الروايات الخاصة باجاثا كريستي والروايات الرومنسية
..
كنت احب افلام الرعب لكني تركتها بسبب كثرة المشاهد الهابطة اللي فيها حسيت صارت تجيب لي احباط وانا اغير المشهد مما يفسد علي جو الفلم..
وصار عندي تبلد واكثر افلام الرعب تبان انها كذب!
يعني شيء ممل من جد ودي اشوف فلم رعب بمعنى الرعب!
والحين طايحة في الانمي والبرامج الواقعية ~
ممكن بعدين احكي عن عملي وزبائني المتعبين الله يصلحهم..
تصبحون على خير!
مسآء الخير والاحساس والكهرباء..
واليوم طفت الكهرباء وكان عندنا زبائن..
ما احد انبسط كثر العاملات انه ما عاد فيه شغل..
شغلوا اغانيهم هالفلبنز قاموا يرقصون ويغنون ..
شكراً لكل اللي قيموني وراسلوني احبكم كلكم..
والله اني سعيده لانه متابعتكم وحماسكم مع سواليفي يسعدني ويكفيني..
شكلي راح ازكم واخذت عسل للتو ..
وتنحت في القصة اللي اترجمها..
احس اني تعبانه نفسياً وجسدياً ومعنوياً وكل شيء..
ودي احبس نفسي في غرفة يوم كامل ما اكلم احد ولاحد يكلمني ولا اسوي شيء..