,, حيث للهباآآل معنى آخر ..,,~>> مدونتي !!

[baboOo]

,, حيث للهباآآل معنى آخر ..,,~>> مدونتي !!

Tweet

لإزالة كل الأعلانات، سجل الآن في منتديات أنيدرا

سلاآآم عليكم جميعا ~

كيف الحال ؟؟

ان شاء الله بخير ~

أنا تمام الحمد لله ماشي حالي

بعد تفكير طويل وعميق في الموضوع

قررت اني أفتح هنا مدونتي الخاصهـ

أكتب فيها كل الي يجي ع بالي ,,

أي كلاآآم في نفسي أجي وأرقعهـ هنا

منها أفرررغ شويهـ من الي جواتي >> وترى الي جواتي مو قليل

ومنها تعرفوا عني اكتر حبتين

ان شاء الله تعجبكم مدونتي ,, وأعجبكم أنا كشخص

وما تلاقوا مني الا كل خييييير

^^

الموضوع الأصلي : ,, حيث للهباآآل معنى آخر ..,,~>> مدونتي !! || الكاتب : baboOo || المصدر : منتديات أنيدرا

[baboOo]

سلاآآم عليكم مررهـ تاآآنيهـ ~

هنا سوف أقوم بالتعريف عن شخصي الكريم أنا محدثتكم BaboOo ~

يقولولي BaboOo وهادا اللقب اطلقتوا عليا أختي الصغيرهـ لمن كان عمرها سنة

لأنهـ اسمي صعب النطق فصارت تناديني BaboOo~

ولصق الاسم في العيلهـ كلها ,, في البدايهـ ما كنت حابهـ الاسم

لكن بعدين سمعت أغنيهـ Lee Jun Ki ,, Foolish Love

وسمعت يقول ,, Babo saranghia وانا طبعا من راسي سرت أغنيها

بابو سارانغهيو

هوا قصدهـ حب غبي ,, وأنا قصدي بابو أحبكـ

كل واحد يغني ع الجنب الي يريحهـ

لكن خالتي تقولي من جد انتي baboOo لأنها تحس انهـ هادا الاسم ينقال للقرود

فتقوووول عليا انهـ من جد لايق الاسم عليا لأني زي القردة ما أهجد أبدن

>> ما أدري من فين يجيبوا المقارنهـ هادي ,,

عن نفسي أنا اشوووف انهـ مافي أعقل مني أبددن

وبعد الحكايهـ الطويلـهـ هادي ,, من يوم ما سمعت الأغنيهـ

وانا الاسم دخل مزاجي ,,

عمري 20 سنة بالهجري ,, 19 سنة بالميلادي

اتولدت 22/5/1412 هـ ,, 28/11/1991 مـ

من مواليد برج القوس ~

أنا عن نفسي ما أؤمن بهادي الأشياء ,,

لكن عندي بنت خالي مجنووونهـ أبراآآآج ,,

كل شي لاآآزم تعرف ايش برجهـ

اذا عجبنا مطرب ولا ممثل تدور معلومات عنهـ عشان تعرف برجهـ عشان تعرف نسبة التوافق بيننا

>> تقولوا زواآآج ما سار بس مجرد اعجاآآب

تضحكني مررهـ ,, ربي يسعدها

انا حاليا أدرس في جامعهـ عزوز ,, وهل يخفى القمر !!

تخصص ملابس ونسيج ~

لحد يسئلني كيف دخلتهـ ,, شكلهـ من كتر ما احش ماما ( لأنها أبلة تفصيل وخياطة )

ربي بلاني ودخلت نفس القسم

وع قولة الي قال " من عيب فابتلي "

يللا كلها سنتين ونتخرج ونفتكـ ,, دعواآآآتكم

ترتيبي في العيلهـ التالتهـ قبلي بنتين وبعدي ولدين وبنت

وضعي في العيلهـ ,, مجنووووووووووووونهـ

ما أسمع الا ( هبلة ,, خبلة ,, غبية ,, ياربي من فين جات البنت هادي ) !!

وكلها أوقاآآآت مزح

لا تحسبوا اني عايشهـ عنف أسري >> براآآآآآآ

طبعا وكما هوا واضح أنا E.L.F قلبا وقالبا ~

فرقتي حبيبة ألبي Super Junior ,,

ما أدري كيف طبيت ع راآآسي وحبيتكم

بس والله ما أنلام ~

ماما دايما تناديهم " الحريم تبعونكـ "

ونجلس نتضارب سنهـ ع الكلمهـ هادي >> مزح

حقولكم ترتيب أوباآآتي حبايب ألبي عندي ,,

" على اعتبار السوجو 13 "

1- هاآآن أوباآآ وبعدهـ بدرجهـ تشولاآآ اوباآآ

لكن ححطهم في نفس المرتبة

2- توكي أوباآآ

3- كيوناآآ ,, ييسونغ ,, انهيوكـ ,, كيبوم أوباآآ

4- دونقهي أوباآآ ,, سونغمين أوباآآ

5- شيندونغ أوباآآ

6- كانغ ان أوباآآ

7- ريووكـ اوباآآ

8- شيوون أوباآآ

داآآآيمن الناس تستغرب انهـ شيوون أوباآآ في المركز الأخير ,,

لكن مدري ,, كدهـ جا في قلبي

ودحيييييين بعد الهرج هادا كلهـ ,, اقولكم حياكم الله في مدونتي ~

الصور الي ححطها أغلبها حتكون ملطوشهـ

مو أنا الي عاملتها

أعتذر ع الموضوع المقربع ,, لكني ما أعرف للتنسيق والكلام الكبير هادا

ان شاء الله يعجبكم كلامي الي ما يخلص ~

^^

[baboOo]

أقولكم ع حكاآآيهـ سارت معايا اليوم ع السحور ,,

كنا جالسين نتسحر مع العيلهـ وحاطين قناة القرآن والشيخ يقرأ سورة يوسف

وصل للآية " انه من كيدكن ,, ان كيدكن عظيم "

قام أخوياآآ الي عمرهـ 11 سنة طل فياآآ نظرهـ كدهـ

وسار يأشر ع الجنس الناعم الي جالس ع السفرة ( أنا وماما وأختي )

قلتلهـ : شفت كييف عشان تعرف اننا محنا هينيين

قامت جات الآية " واضربوهن "

قام قال : شفتوا واضربوهن وساآآر كدهـ يطل بابتسامهـ

وبعدين شلنا السفرة وكل شي

وانا راآآيحهـ ع الحمام ( الله يكرمكم )

كان بيقرأ سورة تانية الشيخ وتقول الآية " الرجال قوامون على النساء "

قام أخويا قالي : شفتي الرجال قوامون على النساء

قلتله : ايوة كمل الآية ~

قالي : "بما فضل الله بعضهم على بعض"

قلتله : ايوة ~

قالي : ما اعرف الباقي

قلتله : اهاآآآ " وبما أنفقوا من أموالهم " ,, لمن تسير تنفق عليناآآ تعال سير قوام زي ماتبى

وانتهي الحواآآآآر ~

ما أدري كيف تنزرع هادي الأفكار في مخهم ,,

قد ما نحاول معاهم مافي فايدهـ

حتفضل هادي الأفكار مزروعهـ فيهم ,,

طيب الين متى !!

^^

[baboOo]

يحكى أن ~

لمن مامتي كانت حاآآمل فياآآآ ( وهـ علياآآ اجنن ) ,,

كنت بسس اتحركـ ما أهجد ,, من يومي وفيا جوناآآآآن

وكانوا كل عماتي يقولولها أكيييييد ولد

هادي ما تسير الا على أولاد

ولأن مامتي( الله يخليها ويطول بعمرها ) حملت في أخواتي قبلي

وصح ما قد وحدهـ فيهم سوت الي انا بسويهـ فيها

صدقت كلامهم ,,

وبدأت تشتري ملاآآبس أولاآآآد ,, وغرفتي زينتها استعدادا لقدووم أول ولد في العيلهـ

واختارتلي اسم ( ربيع )

وجا اليوم الموعود وولدت ماما بالسلامهـ

جابتني ونورت الدونياآآآ ,, ومن هنا كانت الصدمهـ

مبروووووووووكـ جالكـ بنت !!

هههههههههههههههههههههههههههههههههههههههههههههههـ

نفسي كنت أشووف الصدمهـ على وجهـ ماما وبابا

لكن كنت في الحضانة فاتتني اللحظهـ

كل يوووم أحمممد ربي وأسجد سجود شكر

اني طلعت بنت ~

اخواتي للآن يفتكروا هادي القصهـ ويحشوني ,,

يقولوا لماما كنت تسميها ( ربيعهـ ) طيب !!

وأنا أسويلهم كدهـ

هههههههههههههههههههههههههههههههههههههههههـ

الحممد لله على اسمي الجميييل الي أحسلو لايقلي

والهباآآل والحرررركهـ من يومي وأنا جنينهـ في بطن أوممي

^^

[baboOo]

يحكى أن ~

لمن كان عمري 3 سنين

سافرت مع العيلهـ الكريمهـ لماليزيا

طبعا لولا الصور والفيديو ما كنت حفتكر شي من السفرهـ هادي الصراحهـ

المهم كانوا في السفرهـ هادي ,,

ماما وبابا وسوسو وتوتا وخالتي وزوج خالتي وخالي ومرة خالي وستي وهوبي ونانا وأنا طبعا ما أنساني

يقولولكم يوووم أستأجرنا شاليهات ع البحر لـ 3 أياآآآم

وكنا مآخدين 3 شاليهات ,, والشاليهات قداآآآم البحر

مافي لا طريق ولا شي يفصل بينهم

لكن مشواآآآآآآآآآآآر من البحر للشاليهـ والطريق كلهـ رماآآآل الشاطئ

>> تعبت في الوصف تراآآآ

ويقولولكم آخر يوم لينا في الشاليهـ ,,

لبستني ماما أول شي ,, واتلهت في أخواتي ~

والا بعد مضي برهة من الزمن >> ركزوا على برهة هادي

تدور علياآآ مامتي وما تلاقيني

طبعا مخخها يطيييير ,,

تروح الشاليهات التلاتهـ يدوروا علياآآ

يمكن رحت هنا ولا هنا

أبددددن ,, انني التي اختفييييت

انشقت الأرض وبلعتني

والا بعد اللفلفهـ والصريييييخ والتدوير

انهم يلاقوني جالسهـ أتمشى على شاطئ البحر بمفردي

وألعب في الماء وأرسم ع الرماآآآل

>> ما تعرفوني رومانسيهـ من يومي

ههههههههههههههههههههههههههههههههههههههـ

كانت ذكرى سعيدهـ من الذكريات الي ما أتذكرها >> اذا فهمتوا قولولي

^^